Pasig River Expressway: Proyekto Ng Mga Manginginom?
Ayon sa ating Automologist na si Harold, mayroon pang isang rason para uminom ng beer…
Maniniwala ka ba na isang 19.37 kilometrong expressway ang ngayon ay itinatayo sa pinakakilalang Ilog Pasig sa Maynila? Kaisa ang Philippine National Construction Corporation (PNCC), ang 90 bilyong proyektong ito ay sinimulan ng San Miguel Holdings Corporation (SMHC) at maituturing na isang proyekto kasama ang milyong Pilipino na hindi matatawaran ang pagkahilig sa pag-inom ng alak.
Matagal na rin naisantabi ang maraming proyektong pang inprastraktura sanhi ng isyu sa “right of way” o ang pagtutol ng mga pribadong landowners sa pagkuha ng gobyerno sa mga pribadong pagmamay-ari upang gawin itong pampublikong gamit at bayaran na lamang sila ng karampatang halaga (“right of eminent domain”). Bilang antala, ilang taon din ang inabot ng mga planong imprastraktura sa kamay ng korte.
Isang halimbawa rito ang pagtayo sa Skyway 3 na kumokonekta sa South at North Expressways. Naisakatuparan lamang ang konstruksyon nito noong napagpasyahan na ipadaan ito sa ibabaw ng San Juan River na nagbunga rin ng ideya ng pagpapatayo ng nasabing expressway sa ibabaw mismo ng Ilog Pasig.
Ang Pasig River Expressway o tatawagin ding PAREX ay isang six-lane elevated expressway na maaring daanan ng mga motorist na magsisimula sa Radial Road 10 ng Maynila at magkokonekta sa South East Metro Manila Expressway sa Circumferential Road 6. Ang proyekto ay sinasabing may 2.7 km na nakakonekta sa Skyway Stage 3 mula Nagtahan hanggang Plaza Azul.
Ang PAREX ang magkokonekta sa Silangan at Kanlurang bahagi ng Mega Manila- silangan ng Marikina, Pasig, Taguig at ilang bahagi ng Rizal gaya ng Cainta at Taytay patungo sa Kanlurang bahagi ng Maynila at San Juan. Sinasabing maaring makabawas ito sa mabigat na daloy ng trapiko sa R-10, EDSA at C-5 dahil na rin sa pagiging daan nito para magamit ang iba pang mga ruta.
Isa pa sa magandang dulot ng nasabing proyekto ay hindi lamang ang pagiging mahusay na gamit nito sa mga motorista ngunit pati na rin sa kalikasan. Ang patuloy na pagtatanggal ng mga basura sa ibabaw at ilalim ng ilog ay maaring maging daan sa pagkahupa ng mabilis na pagbaha sa syudad na nararanasan tuwing tag-ulan.
Nakakapagtaka kung bakit wala man lamang nakaisip sa magandang ideya na ganito noong una palang? Ang paglilinis sa Ilog Pasig ay siguradong masakit sa bulsa ngunit ang paglilinis dito upang mas kapaki-pakinabang na uri ng transportasyon ay di hamak na isang napakagandan ideya hindi ba?
